लहान मुलांना उचकी का लागते?

मुलांना सतत उचकी लागते? मग जाणून घ्या त्यामागील कारणं व घरगुती उपाय!

उचकी (hiccough ) म्हणजे अत्यंत त्रासदायक समस्या होय, एकदा आली की पाठ सोडायचं नावच घेतच नाही. अशावेळी आपली काय अवस्था होते हे आपल्याला माहित. हि उचकी लहान बाळाला सुद्धा लागू शकते आणि त्याचा त्या बाळालाही खूप त्रास होऊ शकतो. उचकी का येते यामागे ठोस कारण अजून तरी सापडलेले नाही. शिवाय आपण या समस्येला नियंत्रित देखील करू शकत नाही. ती जशी येते तशी स्वत:च जाते. ना या समस्येचा वयाशी काही संबंध आहे.

लहानांपासून मोठ्यांपर्यंत सर्वांना या उचकीचा सामना करावा लागतो. आपल्या लहान बाळाला उचकी लागली की अनेक पालक धास्तावतात, त्यांना भीती वाटते. म्हणूनच आज आपण जाणून घेऊया की बाळाला उचकी का येते आणि उचकी येणे कोणत्या गोष्टीचा संकेत असतो का?

उचकी म्हणजे काय?

अनेकांना हा प्रश्न पडतो. तुम्हालाही कधी ना कधी पडला असेल. तुम्हाला त्याचे उत्तर आधीच माहित असले तर उत्तम. नसेल माहित तर चला जाणून घेऊया. तर जेव्हा अचानक तोंडात हवा घुसून स्वर नलिकेमध्ये प्रवेश करते तेव्हा उचक्या सुरु होतात. या स्थितीमध्ये वोकल कोर्ड ज्या आपल्या गळयामध्ये असतात त्या लवकर बंद होतात आणि उचकीचा आवाज सुरु होतो. तर अशी आहे हि उचकीची सामान्य प्रकिया! उचकी आल्यावर अजिबात घाबरून जाण्याचे कारण नाही कारण उचकी स्वत:च आपोआप थांबते.

बाळाला का येते उचकी?

हा एक अत्यंत महत्त्वाचा प्रश्न आहे ज्याचे उत्तर आजही अनेकांना माहित नाही. अनेक संशोधनातून यामागचे ठोस कारण शोधण्याचा प्रयत्न झाला आहे, मात्र अजूनही नक्की बाळाला उचकी का येत असावी हे मात्र सापडलेले नाही. पण अशा काही गोष्टी आहेत ज्या बाळाच्या उचकी येण्याला कारणीभूत असू शकतात आणि त्या सिद्ध झाल्या आहेत. आपण त्याच गोष्टी आता जाणून घेऊया. जेणेकरून तुम्हाला सुद्धा बाळाला उचकी येण्यामागची कारणे कळतील. बाळ गर्भात असतानाही त्याला उचकी येते आणि ती उचकी एम्‍निओटिक फ्लूइड गिळल्याने येते. जन्मानंतरची कारणे मात्र विविध आहेत.

दूध जास्त पिणे आणि हवा गिळणे

जर तुमचे बाळ खूप जास्त दूध पीत असेल आणि त्याचे पोट फुगत असेल तर हे ब्लोटिंगला कारणीभूत ठरू शकते. यामुळे डायफ्राम वर दबाव पडतो आणि एब्‍डोमिनल कॅव्हिटी पसरते. यामुळे अचानक कॉन्‍ट्रेक्‍शन निर्माण होते व ते उचकीचे रूप घेऊ शकते. बॉटल मधून दूध प्यायल्याने सुद्धा बाळाला उचकी येण्याची शक्यता असते. कारण दुधासोबत बाळ हवा सुद्धा गिळते. यामुळे बाळाचे पोट वाढते व त्याचा परिणाम म्हणून उचकी येते.

प्रदूषित हवा, अस्थमा आणि अ‍ॅलर्जी

बाळाचे शरीर हे अत्यंत संवेदनशील आणि नाजूक असते. त्यामुळे हवेमधील प्रदूषित घटक बाळाच्या शरीराला सहज विळखा घालतात. या घटक तत्वांमुळे जर जास्त वेळ खोकला झाला तर त्याचा प्रभाव डायफ्राम वर पडतो आणि कॉन्‍ट्रेक्‍शन सुरु होऊन उचकी लागते. जे बाळ अस्थमा पिडीत असते त्याला वारंवार उचकी येते. याचे कारण हे आहे की अशा बाळाच्या फुफ्फुसाच्या ब्रोंकाई मध्ये सूज आलेली असते. यामुळे डायफ्राम वर परिणाम होऊन उचकी येण्यास सुरुवात होते. बाळाच्या अन्न नलिकेत सूज निर्माण होते. त्याचा प्रभाव डायफ्राम वर पडतो आणि कॉन्‍ट्रेक्‍शन सुरु होऊन उचकी लागते.

बाळाची उचकी कशी थांबवावी?

हि अत्यंत महत्त्वाची गोष्ट आहे आणि अनेक पालकांना हा प्रश्न सतावतो. आज आपण त्याचे उत्तर जाणून घेऊया. तर मंडळी जर दूध पिताना बाळाला उचकी लागली तर त्याला शांत करा. बाळाला जेव्हा खूप भूक लागलेली असते आणि तेव्हा तुम्ही त्याला दूध पाजत तेव्हा सुद्धा बाळाला उचकी येते म्हणून हि गोष्ट लक्षात ठेवावी की बाळाला खूप भूक लागण्यापूर्वीच दूध पाजून घ्यावे. यामुळे दूध पिताना उचकी लागण्याची शक्यता फार कमी होते. याशिवाय डॉक्टरांच्या मार्गदर्शनाने सुद्धा तुम्ही उचकी थांबवण्याचे इतर उपाय ट्राय करू शकता.